दूरदेशी गेला बाबा... गेली कामावर आई
नीज दाटली डोळ्यात , तरी घरी कुणी नाही !! ध्रु !!
कसा चिमणासा जीव , कसाबसा रमवला
चार भिंतित धावुन दिसभर दमवला
' आता पुरे ! झोप सोन्या..' कुणी म्हणतच नाही !! १ !!
कशासाठी कोण जाणे देती शाळेमध्ये सुट्टी ?
कोणी बोलायाला नाही...कशी व्हावी कट्टी-बट्टी ?
खेळ ठेवले मांडून ... परि खेळगडी नाही !! २ !!
दिसे खिडकीमधुन जग सारे , दिशा दाही
दार उघडुन तरी तिथे धावायचे नाही
फार वाटे जावे परी - मुठीमध्ये बोट नाही !! ३ !!
नीज दाटली डोळ्यात , तरी घरी कुणी नाही
दूरदेशी गेला बाबा......
गीत : संदीप खरे
संगीत : सलील कुलकर्णी
स्वर : सलील कुलकर्णी
अल्बम : अग्गोबाई ढग्गोबाई
